Barbón asegura que Sánchez ye "receptivu" a buscar soluciones "a curtiu plazu" pal vial de Xove

El PP propón que Principáu y Xixón diseñen el vial de Xove y que lu pague y faga Tresportes

El presidente del Gobiernu, Pedro Sánchez, amosóse esti vienres "mui receptivu a buscar soluciones a curtiu plazu" pal vial de Xove dempués de que’l xefe del Executivu asturianu, Adrián Barbón, espresára-y el so refugu a la construcción d’unu en superficie.

Asina se pronunció Barbón en rueda de prensa dempués de tener un alcuentru en Moncloa con Sánchez nel que-y espunxo les principales demandes de la comunidá y sobre les que’l xefe del Executivu amosárase "conocedor de primer mano".

El presidente asturianu treslladó-y a Sánchez qu’un vial en superficie xeneró’l refugu de los vecinos de Xixón y de l’aministración rexonal y local.

El PP propón que Principáu y Xixón diseñen el vial de Xove y que lu pague y faga Tresportes

Esta mañana, los populares, per parte de so, proponen un conveniu a tres pal vial de Xove. Un conveniu nel que seyan el Principáu y l’Ayuntamientu de Xixón los que redacten el proyectu pa que llueu seya’l Ministeriu’l que lu financie y faga.

Ye una propuesta presentada güei pol senador y presidente del PP de Xixón, Pablo González, y que llevará a la comisión de Tresportes de la cámara alta del martes viniente. La propuesta saldrá alantre porque’l PP tien mayoría absoluta nel Senáu pero González pide a los senadores socialistes asturianos que la sofiten.